Shiva Panchksara Stotram

 

ശിവപഞ്ചാക്ഷര സ്തോത്രം

Sivapanchakshara Stotram

---

ശിവായ നമഃ || 

ശിവപഞ്ചാക്ഷര സ്തോത്രം

നാഗേന്ദ്രഹാരായ ത്രിലോചനായ 
ഭസ്മാംഗരാഗായ മഹേശ്വരായ | 
നിത്യായ ശുദ്ധായ ദിഗംബരായ 
തസ്മൈ നകാരായ നമഃ ശിവായ ||*൧|| 

മന്ദാകിനീസലിലചന്ദനചര്ചിതായ 
നന്ദീശ്വരപ്രമഥനാഥമഹേശ്വരായ | 
മന്ദാര മുഖ്യബഹുപുഷ്പസുപൂജിതായ 
തസ്മൈ മകാരായ നമഃ ശിവായ ||൨|| 

ശിവായ ഗൗരീവദനാബ്ജവൃന്ദ സൂര്യായ 
ദക്ഷാധ്വര നാശകായ | 
ശ്രീനീലകണ്ഠായ വൃഷധ്വജായ  
തസ്മൈ ശികാരായ നമഃ ശിവായ ||൩||

വസിഷ്ഠകുംഭോദ്ഭവഗൗതമാര്യമുനീന്ദ്രദേവാര്ചിതശേഖരായ | 
ചദ്രാര്ക വൈശ്വാനരലോചനായ തസ്മൈ വകാരായ നമഃ ശിവായ ||൪||

യക്ഷസ്വരൂപായ ജടാധരായ പിനാകഹസ്തായ സനാതനായ | 
ദിവ്യായ ദേവായ ദിഗംബരായ തസ്മൈ യകാരായ നമഃ ശിവായ ||൫|| 

പഞ്ചാക്ഷരമിദം പുണ്യം യഃ പഠേച്ഛിവസന്നിധൗ | 
ശിവലോകമവാപ്നോതി ശിവേന സഹ മോദതേ ||൬|| 

ഇതി ശ്രീമച്ഛങ്കരാചാര്യവിരചിതം ശിവപഞ്ചാക്ഷരസ്തോത്രം സംപൂര്ണം || 

(*൧-അസ്യാഗ്രേ ’ആസമാപ്തം’ ഇത്യാദിപ്രക്ഷിപ്തശ്ലോകാഃ ക്വചിദ്ദ്രുശ്യന്തേ |) shivam.org

Kalabhairashtakam

 

കാലഭൈരവാഷ്ടകം

Kalabhairava Ashtakam

---

ശിവായ നമഃ ||

 

കാലഭൈരവ അഷ്ടകം

 

ദേവരാജസേവ്യമാനപാവനാംഘ്രിപങ്കജം

വ്യാലയജ്ഞസൂത്രമിന്ദുശേഖരം കൃപാകരം 

നാരദാദിയോഗിവൃന്ദവന്ദിതം ദിഗംബരം

കാശികാപുരാധിനാഥ കാലഭൈരവം ഭജേ|| ൧||

 

ഭാനുകോടിഭാസ്വരം ഭവാബ്ധിതാരകം പരം

നീലകണ്ഠമീപ്സിതാര്ഥദായകം ത്രിലോചനം |

കാലകാലമംബുജാക്ഷമക്ഷശൂലമക്ഷരം

കാശികാപുരാധിനാഥ കാലഭൈരവം ഭജേ ||൨||

 

ശൂലടങ്കപാശദണ്ഡപാണിമാദികാരണം

ശ്യാമകായമാദിദേവമക്ഷരം നിരാമയം |

ഭീമവിക്രമം പ്രഭും വിചിത്രതാണ്ഡവപ്രിയം

കാശികാപുരാധിനാഥ കാലഭൈരവം ഭജേ ||൩||

 

ഭുക്തിമുക്തിദായകം പ്രശസ്തചാരുവിഗ്രഹം

ഭക്തവത്സലം സ്ഥിതം സമസ്തലോകവിഗ്രഹം |

വിനിക്വണന്മനോജ്ഞഹേമകിങ്കിണീലസത്കടിം

കാശികാപുരാധിനാഥ കാലഭൈരവം ഭജേ ||൪||

 

ധര്മസേതുപാലകം ത്വധര്മമാര്ഗനാശകം

കര്മപാശമോചകം സുശര്മദായകം വിഭും |

സ്വര്ണവര്ണശേഷപാശശോഭിതാംഗമണ്ഡലം

കാശികാപുരാധിനാഥ കാലഭൈരവം ഭജേ || ൫||

 

രത്നപാദുകാപ്രഭാഭിരാമപാദയുഗ്മകം

നിത്യമദ്വിതീയമിഷ്ടദൈവതം നിരഞ്ജനം |

മൃത്യുദര്പനാശനം കരാളദംഷ്ട്രമോക്ഷണം

കാശികാപുരാധിനാഥ കാലഭൈരവം ഭജേ ||൬||

 

അട്ടഹാസഭിന്നപദ്മജാണ്ഡകോശസന്തതിം

ദൃഷ്ടിപാതനഷ്ടപാപജാലമുഗ്രശാസനം |

അഷ്ടസിദ്ധിദായകം കപാലമാലികന്ധരം

കാശികാപുരാധിനാഥ കാലഭൈരവം ഭജേ ||൭||

 

ഭൂതസംഘനായകം വിശാലകീര്തിദായകം

കാശിവാസലോകപുണ്യപാപശോധകം വിഭും |

നീതിമാര്ഗകോവിദം പുരാതനം ജഗത്പതിം

കാശികാപുരാധിനാഥ കാലഭൈരവം ഭജേ ||൮||

 

കാലഭൈരവാഷ്ടകം പഠന്തി യേ മനോഹരം

ജ്ഞാനമുക്തിസാധനം വിചിത്രപുണ്യവര്ധനം |

ശോകമോഹദൈന്യലോഭകോപതാപനാശനം

തേ പ്രയാന്തി കാലഭൈരവാംഘ്രിസന്നിധിം ധ്രുവം ||൯||

 

ഇതി ശ്രീമച്ഛങ്കരാചാര്യവിരചിതം കാലഭൈരവാഷ്ടകം സംപൂര്ണം || shivam.org

 

Dwadasha Jyothirlinga stotra

 

ദ്വാദശ ജ്യോതിര്ലിംഗ സ്മരണം

Dvadasha Jyotirlinga Smaranam

---

ശിവായ നമഃ || 

ദ്വാദശജ്യോതിര്ലിംഗസ്മരണം

സൗരാഷ്ട്രേ സോമനാഥം ച ശ്രീശൈലേ മല്ലികാര്ജുനം | 
ഉജ്ജയിന്യാം മഹാകാളമോങ്കാരമമലേശ്വരം ||൧|| 

പരല്യാം വൈദ്യനാഥം ച ഡാകിന്യാം ഭീമശങ്കരം | 
സേതുബന്ധേ തു രാമേശം നാഗേശം ദാരുകാവനേ ||൨|| 

വാരാണസ്യാം തു വിശ്വേശം ത്ര്യംബകം ഗൗതമീതടേ | 
ഹിമാലയേ തു കേദാരം ഘുസൃണേശം ശിവാലയേ ||൩|| 

ഏതാനി ജ്യോതിര്ലിംഗാനി സായം പ്രാതഃ പഠേന്നരഃ | 
സപ്തജന്മകൃതം പാപം സ്മരണേന വിനശ്യതി ||൪|| 

ഇതി ദ്വാദശജ്യോതിര്ലിംഗസ്മരണം സംപൂര്ണം || shaivam.com

Bilwashtakam

 ശിവായ നമഃ || 

ശിവ അഷ്ടകം

പ്രഭും പ്രാണനാഥം വിഭും വിശ്വനാഥം ജഗന്നാഥനാഥം സദാനന്ദഭാജം | 
ഭവദ്ഭവ്യഭൂതേശ്വരം ഭൂതനാഥം ശിവം ശങ്കരം ശംഭുമീശാനമീഡേ ||൧|| 

ഗലേ രുണ്ഡമാലം തനൗ സര്പജാലം മഹാകാലകാലം ഗണേശാധിപാലം | 
ജടാജൂടഗംഗോത്തരംഗൈര്വിശാലം ശിവം ശങ്കരം ശംഭുമീശാനമീഡേ ||൨|| 

മുദാമാകരം മണ്ഡനം മണ്ഡയന്തം മഹാമണ്ഡലം ഭസ്മഭൂഷാധരം  തം | 
അനാദിം ഹ്യപാരം മഹാമോഹമാരം ശിവം ശങ്കരം ശംഭുമീശാനമീഡേ ||൩|| 

തടാധോനിവാസം മഹാട്ടാട്ടഹാസം മഹാപാപനാശം സദാ സുപ്രകാശം | 
ഗിരീശം ഗണേശം സുരേശം മഹേശം ശിവം ശങ്കരം ശംഭുമീശാനമീഡേ ||൪|

ഗിരീന്ദ്രാത്മജാസംഗൃഹീതാര്ധദേഹം ഗിരൗ സംസ്ഥിതം സര്വദാ സന്നിഗേഹം | 
പരബ്രഹ്മ ബ്രഹ്മാദിഭിര്വന്ദ്യമാനം ശിവം ശങ്കരം ശംഭുമീശാനമീഡേ ||൫|| 

കപാലം ത്രിശൂലം കരാഭ്യാം ദധാനം പദാംഭോജനമ്രായ കാമം ദദാനം | 
ബലീവര്ദയാനം സുരാണാം പ്രധാനം ശിവം ശങ്കരം ശംഭുമീശാനമീഡേ ||൬|| 

ശരച്ചന്ദ്രഗാത്രം ഗുണാനന്ദപാത്രം ത്രിനേത്രം പവിത്രം ധനേശസ്യ മിത്രം | 
അപര്ണാകളത്രം ചരിത്രം വിചിത്രം ശിവം ശങ്കരം ശംഭുമീശാനമീഡേ ||൭|| 

ഹരം സര്പഹാരം ചിതാഭൂവിഹാരം ഭവം വേദസാരം സദാ നിര്വികാരം | 
ശ്മശാനേ വസന്തം മനോജം ദഹന്തം ശിവം ശങ്കരം ശംഭുമീശാനമീഡേ ||൮|| 

സ്തവം യഃ പ്രഭാതേ നരഃ ശൂലപാണേഃ പഠേത്സര്വദാ ഭര്ഗഭാവാനുരക്തഃ | 
സ പുത്രം ധനം ധാന്യമിത്രം കളത്രം വിചിത്രൈഃ സമാരാദ്യ മോക്ഷം പ്രയാതി ||൯|| 

ഇതി ശ്രീശിവാഷ്ടകം സംപൂര്ണം ||  shaivam.com